Riesige Sünnenblomen bringt mien koole Huuswand to‘n Strohlen

In mien Gorden wiert dat dit Johr fein bleihen. Sünnenblomen loot mien Hart höger schloon. Bit to twee Meter hoch schüllt de „Gelben Riesen“ wierden. Sünd de Sünnenblomen in’ Harvst utbleiht, freit sik de Vogels. Schöne Utsicht.

Een leeve Leserin hett mi dat Sünnenblomensoot schinkt. Dormit ik ut mien passive Stimmung rutkomm und dat Sootutbringen plon. Jo, un dat do ik nu ok. So‘n groote Sünnenblomen kannst jo blots dorhin setten, wo se Schutz hebt. An‘ne Huuswand, to‘n Bispeel. No Süden hen, dat schall jüm woll gefallen.

15 Sünnenblomenkarn sind in‘ne Tuut binnen. In April un Mai kann ik se an Ort un Stee utleggen. Wat wiert dat schön utsehn, wenn de Sünnenblomen, de ik seeker anbinnen mutt, bleiht. De ganze Husswand strohlt denn in Geel.

All Lüüd kommt, üm sik dat geele Wunner antokieken. Jo, ik fang al an to drömen. Un ik heff jo ok noch mien suren Wiehnachtsboom von letzt Johr, denn ik, mit Kugeln un Lametta schmückt, dorto stellen kann. Ik kann dat gor nich mehr afftöven, bit dat Sommer is.